Ka kohë që shteti i Kosovës, ky që është, thotë me krenari se është ndalur fluksi i atyre që po ikin… E, në fakt, secili po të ketë mundësi do të ikte brenda natës, e lëre më ditën
Fluksi i shqiptarëve kosovarë që ikin për në Evropë nuk është ndalur e as që do të ndalet ndonjëherë… Ky eksod e ka një “pronar”, i cili është akoma një enigmë që duhet zbuluar
“Pronari” i eksodit të parë ishte Milosheviqi dhe eksodi zgjati hiq më pak se dhjetë vjet. Ndërkaq, në eksodin e dytë mendohet se fajet i kemi vetë ne, meqë edhe 20 vjet pas çlirimit të Kosovës, shteti ynë ka bërë shumë pak për vende të reja pune për njerëzit hallexhinj, duke i lënë anash ata që punësohen edhe brenda natës përmes lidhjeve familjare e partiake
Se pakënaqësia dhe varfëria ka arritur kulmin e dëshmon edhe fakti se sivjet, me rastin e Vitit të Ri, populli pak festoi, për të mos thënë hiq. Nuk erdhën as mërgimtarët si herëve të tjerë për të festuar në tokën nënë
Ndodhi tamam si në barsoletën e shumëpërfolur: Në përvjetorin e parë të pavarësisë së Kosovës pothuajse secili qytetar i kishte uruar, së pakut, nga disa herë pavarësinë e shtetit tonë shokut, mikut vëllait, motrës, prindërve… Sepse, shpresat se shteti do të ofronte bukë të mjaftueshme për gjithsecilin ishin të mëdha
Në vitin e dytë urimet kishin shënuar përgjysmim. Vitin e tretë ai që i uronte tjetrit ditën e pavarësisë merrte përgjigje injoruese: Ha-ha-ha
Dhe, në vend që të kemi një avancim si shtet në dobi të qytetarëve, sot pjesa dërmuese e popullatës jeton në varfëri dhe synimi kryesor i tyre është si të ikin nga Kosova
Konkretisht, një familje e një lagjeje të Prishtinës i kishte shitur edhe pulat për të bërë sado pak para që të ikë nga Kosova në Hungari! Gjërat tjera po se po, por edhe pulat
Pra, eksodi i tashëm ndodh, kryesisht, shkaku i bazës sociale. Sepse, një numër i konsideruar qytetarësh nuk shohin bukë për nesër, meqë politikanët tanë nuk mendojnë për njerëzit hallexhinj, por për familjarët e tyre dhe përkrahësit politikë
Në anën tjetër, qindra mijëra shkollarë e studentë, e që në një të ardhme edhe do të diplomojnë, s’kanë kurrfarë perspektive
Ku të gjejnë punë? Apo do të kenë të njëjtin fat të ikjes sikur të tjerët
U shemb toka: e kishte lëshuar një orë mësimi
Një prind e kishin ftuar në shkollë të mesme për t’i treguar se i biri e kishte lëshuar një orë mësimi.
Prindi, pasi e kishte dëgjuar profesorin duke iu ankuar për të birin, kur kthehet në shtëpi të birit i kishte rënë shuplakë. Pas pak, teksa ishte penduar për veprimin e bërë në shpejtësi, kishte thënë: “Po çka edhe nëse ka ikur nga ora e mësimit?! Çka edhe nëse kalon shembullor?! Çka edhe nëse regjistrohet dhe e kryen fakultetin, madje edhe me dhjetëshe?! Do të jetë njësoj siç është sot!”. Mu si qytetari që nuk i ishte gëzuar lirimit të derivateve të naftës në Kosovë. Kur e kishin pyetur si po ndihet tash që u lirua nafta e benzina në Kosovë, ai ishte përgjigjur: “Nuk di a u lirua apo u shtrenjtua benzina?! I qes veturës 20 euro benzinë në muaj dhe kaq është për mua!
Safet Krivaça (Kosovarja)
