Erëzat  e përziera, ose vegeta, siç e njohim më së shumti gjendet në variante të ndryshme në supermarkete, me emërtime dhe etiketa nga më të bukurat. Por, asnjëherë nuk mund të jemi të sigurtë, që përmbajtja është e shëndetshme, që erëzat janë të freskëta dhe që nuk kanë kimikate.

E vetmja garanci është data e skadencës. Në fakt, nëse ju e bëni vetë këtë përzierje, mund ta përdorni brenda gjashtë muajve. Kështu, do të jeni më të sigurtë për atë që konsumoni.

Kjo mund të jetë një përzierje me hudhër pluhur, borzilok, rigon, kanellë dhe piper të zi, në kombinim me majdanoz, kopër, borzilok, rozmarinë dhe trumzë. Piperi i kuq, nenexhiku, arrëmyshk dhe qepë pluhur mund të përfshihen gjithashtu.

Erëzat mund të përzihen të gjitha në një pajisje grirëse, ose të përzihen mirë me anën e një luge. Shumica e recetave për erëzat përfshijnë edhe kripë, por duke shtuar se kjo është një çështje e preferencave personale.

Mielli i misrit është gjithashtu një përbërës që shtohet në përzierje, e cila funksionon shumë mirë me mishin e viçit, mishin e derrit, mishin e pulës ose peshkun.

Është gjithashtu një shtesë e mirë për salcat e kuqe dhe salcat e bardha.

Përzierja me erëza mund të ruhet në një enë hermetike në një vend të freskët, të thatë deri në gjashtë muaj./shije